Zynergy marketinq agentliyi və “Indigo Printing House”un birgə təşkilatçılığı, LIBRAFF kitab mağazalar şəbəkəsinin dəstəyi ilə həyata keçirilən hekayə müsabiqəsinin yekun tədbiri və mükafatlandırma mərasimi 28 fevral tarixində saat 11:00-da LIBRAFF-ın “Park Akademiya” filialında keçirilib.
Müsabiqə gənc yazarların yaradıcılıq potensialının üzə çıxarılması, onların daha geniş auditoriyaya təqdim edilməsi və ədəbi mühitdə tanınırlığının artırılması məqsədi daşıyıb. İştirakçılar hekayələrini “Təsadüfi görüş”, “Gələcəyə məktub” və “Yayın son günü” mövzuları üzrə təqdim ediblər.
Təqdim olunan hekayələr münsiflər heyəti tərəfindən mövzunun əhatəsi, süjet xəttinin maraqlılığı və dil-üslub xüsusiyyətləri meyarları üzrə qiymətləndirilib. Qiymətləndirmə hər bir meyar üzrə 10 bal olmaqla, ümumilikdə 30 ballıq şkala əsasında aparılıb. Münsiflər heyətində dosent, filologiya üzrə fəlsəfə doktoru, Azərbaycan Nəşriyyatları Assosiasiyası İctimai Birliyinin (ANAİB) İdarə Heyətinin sədri Şəmil Sadiq, Röyanə Cəfərquliyeva və Tərlan Abbasova Lətifova yer alıb.
Müsabiqənin nəticələrinə əsasən, I yerin qalibi Samirə Əşrəf “Sonuncu yayın sonatası”, II yerin qalibi Məhəmməd Abbasov “Yaddaş”, III yerin qalibi Elnarə Rüstəmova isə “Parçalanmış Ayna” hekayəsi ilə müəyyənləşib. Qaliblər diplom və sertifikatlarla təltif olunmaqla yanaşı, Indigo Printing House-dən istədikləri çap məhsullarını əldə etmələri üçün kuponlarla mükafatlandırılıblar. Belə ki, I yerin qalibinə 500 AZN, II yerin qalibinə 300 AZN, III yerin qalibinə isə 200 AZN dəyərində kupon təqdim olunub.
Nəticələrə əsasən seçilmiş 26 hekayə “Seçilmiş hekayələr” kitabı adı altında çap olunub.
Yekun tədbirdə ədəbiyyat nümayəndələri, şair və yazıçılar, eləcə də qonaqlar iştirak ediblər. Tədbir çərçivəsində Azərbaycan Yazıçılar Birliyinin üzvü Minəxanım Əkrəmqızı, Bəhiyyə Nağıyeva, Sevinc Rza, Aləmzər İlay və Aytəkin Mehmanqızı kimi ədəbiyyat təmsilçiləri də yer alıb. Onlar çıxışları zamanı yaradıcılıq təcrübələrini bölüşüb, gənc müəlliflərə tövsiyələr verib və şeirlər səsləndiriblər. Təşkilatçılar layihənin əsas hədəfinin gənc qələm sahiblərinin yaradıcılıq təşəbbüslərini stimullaşdırmaq, yazı mədəniyyətinin inkişafına töhfə vermək və yeni müəlliflərin tanıdılması üçün davamlı platforma formalaşdırmaq olduğunu bildiriblər.